Corría o ano 1989 e, a través dunha iniciativa civil privada veciñal tentábase recuperar a ledicia xamais esquecida de recuperar unha banda en Ribadeo. Iniciábase así a constitución dunha comisión xestora para crear unha Academia de Música e a captación de socios e afiliados cunha masiva resposta social ribadense. Tamén desta maneira comezan os contactos para conseguir profesor-director. Contáctase con Hernán Naval para a formación musical dos asociados até acadar o nivel necesario para a criación dunha banda de música e, ao mesmo tempo, constituese a tal fin a asociación “Amadores da Música”. O 25 de xaneiro do ano 1992, case un ano antes do previsto, con corenta e un músicos de idades comprendidas entre os dez e os cincuenta anos, ateigados de nervios e baixo a batuta de Hernán Naval, preséntase a Banda de Ribadeo na igrexa parroquial cun programa que xuntaba “tradición e modernidade” e que acadaría un rotundo éxito en Ribadeo e arredores. “Hoxe nen os santos o cren” contaron algúns cronistas oficiosos ribadenses que se dixo aquel día na igrexa. O ano seguinte e en virtude dun convenio asinado entre o Excmo Concello de Ribadeo e a asociación “Amadores da Música” a banda pasaría a chamarse Banda Municipal de Ribadeo.

(Identificadas coa troula festiva, as bandas populares sofren aínda hoxe un algo, o apunte dun damóclito índice: dianas e alboradas entre nove e doce, procesión á unha, sesión vermouth (antes pezas da misa) ás dúas, concerto (?) ás sete, verbena de dez da noite a tres da madrugada...A soprar!. Hernán Naval. La Voz de Galicia.Xaneiro 92)

Quizais precisamente por marcar outras liñas musicais nun contorno onde pesaban máis as tradicións, e tentar dignificar as bandas como ferramenta cultural coma teima permanente do seu director, o heterodoxo facer da banda municipal e as súas liñas musicais que achegaban a música a públicos e gustos de distintas idades foron en ascenso e Hernán Naval, ao redor do seu traballo conseguiu artellar o rexurdimento da banda de música que sacou da nada ata convertela nunha potente formación con máis de oitenta músicos que pasou a ser banda sinfónica motivando a músicos, pais e público en xeral e dinamizando o panorama musical ribadense. Tamén fixo un gran traballo na Escola de Música, atraendo e formando centos de rapaces e apoiando todas as agrupacións que naceron baixo o seu seo (Banda Infantil, Contrabanda, Orquestra de cordas, Contrabandiña,…).

Así, baixo a súa batuta, a banda ribadense marcou fitos importantes coma a publicación dun compacto no ano 97. Neste disco, que colleitou un importante éxito de vendas e de crítica, participou o prestixioso pianista cubano Antonio Queija Uz, interpretando o Andante Spianato e Grande Polonesa en Mi Bemol Maior de Chopin, acompañado pola propia Banda. O director da agrupación, o profesor Hernán Naval, realizou a transcrición da parte orquestral. Esta gravación, parcialmente realizada en directo, é boa mostra do heterodoxo proceder da Banda na sua curta pero intensa traxectoria: música clásica de carácter sinfónico, bandas sonoras, nova música para orquestra de vento e percusión…, sempre dende un concepto da actividade bandística de carácter educativo, tanto para o público como para a propia banda. Tamén con Hernán Naval a banda actuou nas principais cidades de Galicia e teatros da xeografía galega e en diversos puntos do estado español (Madrid, Barcelona, Murcia, Oviedo, Aranjuez, etc..) e tamén en Portugal (Loures, Lisboa,…). Asimesmo actuou e fixo gravacións na RTVG e na Televisión Española e tiña case ultimada a gravación do material para dous discos máis…

O 17 de maio do 2001 e a punto de finalizar a gravación de dous CDs, a banda sufriu un duro golpe polo pasamento de quen fora o seu criador, director e principal impulsor, Hernán Naval. Duro golpe non só para a Banda en particular senón tamén para o mundo bandístico en xeral e mesmo a nivel nacional tanto coma para o mundo da ensinanza musical e das escolas de música. As múltiples facetas de Hernán Naval como arregrista, compositor, articulista, organizador, poeta, escritor, político e educador musical deixaron un grande baleiro. Para rematar a gravación en curso, a Banda Municipal de Ribadeo coa colaboración de Marcel van Bree, (prestixioso director amigo persoal de Hernán) que se prestou voluntariamente a colaborar co proxecto por rematar.

Hoxe en día a Banda Municipal de Ribadeo segue a existir baixo a xestión de “Amadores da Música” en colaboración co Excmo Concello de Ribadeo. Neste tempo pasou polas mans de diversos directores coma Marcel van Bree, Mariano Rivas, J. Luis Alvarez Braña e Bernardo Mendez. Actualmente, e baixo a batuta do seu director actual Lourenço Filipe da Silva Cruz realiza anualmente unha programación estábel de concertos en Ribadeo, incluindo programas monográficos (música de cine, música relixiosa, etc.) e outros como o de Nadal (“Aqui como en Viena”) forman parte xa dos eventos culturais tradicionais da localidade. Igualmente o Festival de Bandas que desde 1995 organiza anualmente no mes de xullo ou agosto.

Fonte Rss de Ribadeo.com