En 2007, Mr Misto Films e o Concello de Ribadeo organizaron o III Festival de curtas ON&OFF, que tivo lugar do 1 ao 5 de agosto. Na sección oficial, máis de 40 curtas foron seleccionadas e agrupadas en distintos paquetes (ficción 1, ficción 2, ficción 3, ficción 4, documental-experimental e animación) para ser proxectadas por varios puntos de Ribadeo: no Cantón, no cine Teatro, na zona vella, etc. Por segundo ano, convocouse o certame de curtas A toda mecha. Os medios necesarios para levar a cabo os proxectos foron facilitados pola organización e os participantes contaron cun máximo de 60 horas para realizar os seus traballos. O tema das curtas era libre e tan só tiñan que incluír un elemento de atrezzo e unha localización indicadas pola organización nun sobre pechado, para asegurarse de que as gravacións se realizaban durante o festival e non previamente. Nesta edición houbo un único premio de 3000€, outorgado por un xurado composto por profesionais do audiovisual. As curtametraxes realizadas en A toda mecha 2007 foron: Límite 12 horas, Love is in the air, A miña herdanza, O talento do señor Carrack, Miguelito, Operación Cantón, Espera, La calle es tuya, Case sempre, Sen escrúpulos, Da compra á cesta, Freak Paradise, O tren da vida, O suso e Os quitadores de ferro. No ON&OFF 2007, os directores convidados a gravar curtas en Ribadeo foron: - Javier e Kike Prada con Mariñeiro - Jairo Iglesias con 1936.Ribadeo - Alber Ponte con No tardes Un ano máis, no marco do festival celebráronse numerosas actividades paralelas, como por exemplo, os encontros con profesionais do sector como Susana Rei, Jairo Iglesias e os irmáns Prada. Tamén houbo un coloquio sobre o cine de animación. Tampouco faltaron as proxeccións, entre as que destacan a de De profundis e Carne de canón en Rinlo ou a de O ceo do súper 8 no Cantón. Unha das novidades do ON&OFF 2007 foron os concursos Curtas de peto ePerspectiva allea. O primeiro deles invitaba á xente a realizar pequenas gravacións con teléfonos móbiles ou cámaras, que se podían recoller nas carpas colocadas polos organizadores. Pola súa parte, Perspectiva allea estaba dirixido a persoas non censadas en Ribadeo e animábaos a fotografar a vila e o ambiente do festival. A gala de clausura estivo presentada pola actriz Rosalía Quelle e contou coa actuación do grupo The Ellas, liderado por Luis Tosar. Durante o acto proxectáronse as curtas realizadas por Jairo Iglesias, Alber Ponte e os irmáns Prada. Por suposto, tamén se fixo a entrega de premios e os gañadores foron: - Misto de Ouro na categoría de ficción para La gran revelación, de Santiago de Lucas. - Misto de Ouro na categoría de documental para Cousas do Kulechov, de Susana Rei. - Misto de Ouro na categoría de animación para Carne de canón, de Darío Fernández Ignacio. - Misto de Cera a toda unha carreira na curtametraxe para Alber Ponte. - Misto de Pau de A toda mecha para Sen escrúpulos, de Carlos Seijo. E un ano despois, en 2008, chegaría a IV edición do festival ON&OFF de Ribadeo...
