Ribadeo On line todo sobre Ribadeo - Mai 2025

Paseo por Santalla e Couxela (9 km)

Para saír desde Ribadeo é necesario levar o coche ata o Mesón A Ruca en Porto de Arriba, Parroquia de Santalla de Vilaosende.

Por unha pista asfaltada, logo da subestación do gas , baixamos á Curuxeira e O Carbón, para saír á estrada de Santalla onde se atopa o pazo de Quintalonga. Seguimos despois polos lugares de Torre e Santalla de Arriba, onde se pode ver o que queda da espectacular entrada á antiga igrexa.

Logo de pasado Santalla, no primeiro cruzamento á esquerda, outra pista tamén con asfalto sobe cara á Venta (160 m altitude), e baixa por Cima de Vila ata a estrada de Couxela, cara á esquerda, levaranos cara a Sindín, onde nos desviaremos para ir ao Fornelo.

O kilometro e medio que falta para regresar a Porto será atravesando monte por pista de terra e camiños, anchos e de andar fácil pero humedos. Por alí pódese parar un momento para descansar.

Recomendamos a visita aos dous Portos ( De Arriba e de Abaixo) e ao tunel do tren de Vilaodrid.

Para chegar a Rinlo viaxarase en tren, saíndo da estación de FEVE de Ribadeo ás 11 da mañá. Camiñaremos por rúas e ruelas cara ao sur do núcleo urbano; por unha pista sen asfalto chegamos a Punta Corveira, para regresar pola costa, visitando as tres cetareas e percorrendo o novo paseo marítimo.

Ao chegar á pista polideportiva, continúase polo camiño de serventía pegado ao mar. Na ensenada de Liñares, éntrase na parroquia de Vilaframil e logo das Pudias, na desembocadura do Rego do Couto, hai un area de esparexemento adecuada para descansar.

Pasado o regacho está o Castro de Piñeira e continuando o paseo pola ribeira do mar rodéase a peninsula de Celeirós. Pásase sobre as praias de Areosa e de Olga e éntrase en Vilaselán polo Castro das Grobas. Queda por visitar a desembocadura do río de Vilaselán, que se cruza fronte á depuradora, para terminar saíndo á pista que vai ata a praia de Areosa, xunto a Rocas Brancas e a illa Pancha.

Vólvese a Ribadeo pola Chousa, A Torre, O Circo e Campoxurado.

A ruta verde e os seus vales

Partindo de Ribadeo, iniciamos unha viaxe por de tras das montañas que delimitan a franxa costeira.
Gozando de prados vales e montañas veremos:

SANTA CRUZ: Un dos miradoiros máis fermosos da costa de Lugo. Divísase toda a desembocadura da ría de ribadeo co remate de Galicia e o comezo de Asturias.
É de interese turístico a festa que se celébra o primeiro domingo do mes de agosto.

CEDOFEITA: Ocupa, esta poboación o centro dun precioso val. Destaca dentro da arquitectura civil o Pazo que leva o nome do pobo.

A PONTE: é un cruzamento de camiños. Na capela do pobo existen uns interesantes frescos.

ARANTE: Sempre entre montañas calladas de eucaliptos chegamos ao pobo de Arante. Eminentemente agrícola e gandeiro figura como referente agropecuario da comarca. Interesantes retablos barrocos na Parroquial de San Pedro.

VIDAL: Foi en tempos pretéritos poboación de certa importancia. Tiña xuíz e aínda hoxe consérvase o lugar chamado “A Forca” onde se axusticiaba aos reos.
En “O val dás Eguas” gozaremos da beleza en estado puro destas paraxes.

TRABADA: Tres vaos, tres vales, rodean a este paraíso de paz. Sentirá o viaxeiro unha profunda dita nada máis chegar á cabeceira da comarca. As súas xentes, os seus prados e ríos, as súas montañas forman un todo inesquecible. Veremos o Pazo de Terrafeita, mesón Camiño Norte, Miradoiro da Cadeira, Menhir de “A Pena Verde” e un paseo polo pobo.

FORNEA: Este núcleo de poboación aséntase na saia das montañas que separan a Trabada da costa. Sempre vales con verdes prados.

INSUA: Dá acceso á costa co concello de Barreiros. Camiños e fontes...

San ESTEBAN DO ERMO: Ermida no medio dunha paraxe única. Fonte ferruginosa, fervenza do río, Lenda...tan só lenda.

SARGADELOS

O HOME: Raimundo Ibáñez foi un prohome, un adiantado que viviu na comarca a finais do século XVIII e principios de XIX. Funda a Real Fábrica de Cerámica e Fundición de Sargadelos que lle farán pasar á historia de Galicia e á de España.
é asasinado polo populacho, acusado de afrancesado, no ano 1809 en Ribadeo onde residía no actual Pazo Municipal.

POBOS E LUGARES

FOZ: Interesante pobo mariñeiro. Recomendamos a visita ao porto e as praias.
Saíndo en dirección a Viveiro, a man esquerda atopamos o acceso á ermida do BISPO SANTO, lugar de visita obrigada para o viaxeiro.

FAZOURO: O seu castro celta, recentemente escavado, móstranos a antigüidade destes enclaves costeiros.

BURELA: é o porto pesqueiro por excelencia da costa de Lugo. A súa impresionante flota de altura está equiparada ás mellores do Cantábrico. Visitar Lonxa e Porto

CERVO: Na actualidade é o centro do chamado Fenómeno Sargadelos. Nesta localidade non podemos perdernos, a Fábrica de Porcelana, o paseo dos namorados e a casa do Padroado.

A RUTA DOS OSCOS

A ZONA: Partindo da vila de Ribadeo adentraremonos nunha das comarcas máis bonitas e á vez máis impactantes na cornixa cantábrica.
O ferro, a pedra e a auga conforman o factor común que nos ha de rodear na inigualable comarca dos Oscos.

AGUILLÓN: Xusto enfronte da casa consistorial de Vegadeo tomaremos a estrada que nos conducirá a Taramundi. Antes de chegar á citada vila topamos coa aldea de Aguillón. Non podemos perder a visita ao seu famoso mazo.

TARAMUNDI: Continuando a estrada que tomamos en Vegadeo, chegamos á capital da comarca: Taramundi.
Aquí veremos o Hotel "A Reitoral". A maior parte do antigo edificio está escavado na pedra. O centro do pobo, cos seus comercios de ultramarinos e de artesanía típica da zona, coitelería, mel e derivados e outros produtos do campo.

TEIXOIS: Enclave etnográfico único no seu xénero en toda a zona. Non podemos perder o mazo, o muíño, o xerador de corrente e en definitiva, todas as instalacións que nesta preciosa aldeíña existen.

A PONTENOVA: A principios do século pasado foi o centro mineiro e siderúrxico das instalacións de Vilaodrid, desde alí transportábase mineral ata o Cargadeiro de Ribadeo. Quedan en pé os fornos que convertían en aceiro o mineral extraído das minas existentes.
As troitas de río e o pastel de chicharons poñen a guinda gastronómica a este interesante enclave.

SAN TIRSO DE ABRES: O paseo polo seu val pode ser altamente instructivo desde o punto vista hortícola se visitamos a infinidade de invernadoiros que alí se asentan. Podemos gozar ademais dunha enorme piscifactoría á que está permitido o acceso